ရန်ကုန်မြို့တွင် ဆောက်လုပ်မည့် မိုးပျံရထားလမ်းအတွက် လမ်းကြောင်းရွေးချယ်နေပြီး ဂျပန်နိုင်ငံနှင့် ညှိနှိုင်းဆွေးနွေးနေကြောင်း ပို့ဆောင်ရေးနှင့် ဆက်သွယ်ရေး ဒုတိယဝန်ကြီး ဦးကျော်မျိုးက ပြောသည်။

‘‘လုပ်နေတဲ့အခါကျ လမ်းကြောင်းရွေးတဲ့ဟာတွေ နောက် မိုးပေါ်ပျံမလား၊ မြေအောက်လျှို မလားဆိုတဲ့ ဟာလေးတွေ ဒီဟာကတော့ အတိုင်ပင်ခံတွေနဲ့ အသေးစိတ်လေ့လာနေတဲ့ အဆင့် ပေါ့နော်’’ ဟု ၎င်းက ယမန်နေ့အမျိုးသားလွှတ်တော်အစည်းအဝေးအပြီးတွင် မီဒီယာအချို့အား ပြောသည်။

ထိုသို့ လေ့လာပြီးမှသာဆောင်ရွက်မည့် ဒီဇိုင်းပုံစံကိုသိနိုင်မည်ဖြစ်ကြောင်း ၎င်းကရှင်းပြသည်။

ယင်းစီမံကိန်းကို ပေါ့လျော့စွာမလုပ်ကိုင်ဘဲ သေချာစိစစ်၍တစ်သက်လုံး အကျိုးရှိမည့်လုပ်ငန်းစဉ်အဖြစ် ဆောင်ရွက်မည်ဟု ဒုဝန်ကြီးကဆိုသည်။

ရန်ကုန်မြို့ ယာဉ်ကြောကျပ်တည်းသည့် ပြဿနာဖြေရှင်းနိုင်ရန် မြန်မာအစိုးရဘက်က မြန်မြန်ဆောင်ရွက်ရန် ဆော်သြနေကြောင်း ၎င်းကပြောသည်။

ထို့အပြင် ရန်ကုန်ရှိ ယာဉ်ကြောကျပ်တည်းမှုနှင့် လူနေမှုအဆင့်အတန်း ပိုမိုမြင့်မားလာ စေရန် ရန်ကုန်မိုးပျံလမ်းမကြီး စီမံကိန်းကို ဆောက်လုပ်ရေးဝန်ကြီးဌာနက အကောင်အထည် ဖော်နေမှုလည်း ရှိသည်။

‘‘ဝန်ကြီးဌာနတွေ အကုန်လုံးပူးပေါင်းပြီးတော့ ရန်ကုန်မြို့ပြည်သူတွေအတွက် ယာဉ်ကြော ကျပ်မှု ပြဿနာကို ဝိုင်းဖြေရှင်း မှာပါ’’ ဟု ဦးကျော်မျိုးက ပြောသည်။

ဆက်လက်၍ ရန်ကုန်မြို့တွင် ဂျပန်နိုင်ငံက ပံ့ပိုးကူညီမည့် ဒီဇယ်လျှပ်စစ်ရထားများလည်း ပြေးဆွဲမည်ဟု ၎င်းကဆိုသည်။

 Credit : 7Daydaily